ينقصنا الانتماء

نحن نمتلك كل الثروات الطبيعية والبشرية وأشياء أخرى كثيرة .. ولكننا مثل باقى الدول العربية ..يعيش بيننا ابناء مزيفون ولقطاء من اصحاب النفوس الضعيفة الذين لا بد ان يقدموا فروض الولاء والطاعة لامريكا وغيرها . حتى يحتموا بها للوصول الى الحكم ثم الاستمرار فيه .. ان شعوبنا العربية جميعها تستحق ان تكون اسيادا" على العالم . ولكن حكامنا لم يهتموا بما نملكه من ثروات وخيرات كل هم الغرب ان يحصلوا عليها من خلال تقسيم بلادنا ونشر الفوضى واختلاق الازمات . أن الرجال هم الذين يصنعون التاريخ . ونحن نريد من يحب وطنه مثل عبد الناصر ومن يحب امته العربية ويوحدها ضد الاعداء دون ان يهتم بمن حوله نحن نريد من يختار الرجل المناسب للمكان المناسب من تكون السلطة بالنسبة له حبا" لخدمة وطنه .. ان العبقرية الحقيقية ليست ان تكون رئيسا" او حاكما" . ولكن العبقرية ان تنتج وتصنع وتقيم العدل وان تكون على يقين دائما" أنك موظفا" عند الشعب بدرجة كبير الموظفين . وأنك لست مالكا"لهذا الوطن أومتحكما" فى الشعب , فأنت فى هذا الموقع الوظيفى للقيام بمهام محددة كلفك بها الشعب وهو صاحب السلطة الوحيد . عندما نتملك مثل هذه النوعية كرؤساء .. سوف نتفوق على على كل الاعداء .. فالحضارات التى بناها الاجداد العباقرة . من السهل ان يدمرها الابناء الاغبياء

حبة ديابة

باتفاق الشعب كله
اتخلع مخلوع وغار
قدر يشيل حكم الفساد
لما قام ع الظلم ثار
واكتشفنا اننا لسه ف مكاننا
وان اللى اتخلع بايدنا كان
غلبان
واللى ركب ع الكرسى بعده
كنا فاكرينه ملاك
أتاريه شيطان
والمصيبة مكنش م الثوار
كنا فاكرين البلد رح تتعدل
أتارى فيه حبة ديابة
غيروا شكل المسار
النظام اللى اتخلع
كان يدوب فاسد وخاين
أما اللى سرقوا الثورة منا
غرقانين فى الخيانة والعمالة
والسرقة
ومصر معاها مش فارقة
والثورة صبحت زى نار
بين شعب عاشق للوطن
وجماعة عاشقين الدمار
الفساد لابس قناع المسكنة
والغلبنة
وانه عاش مظلوم ياعينى
اكمنه كان مخلص وبار
واللى فات كان ماضى مخزى
والنظام كان كله عار
.............
هى دى بلدك لوحدك
مش بلدنا كلنا
وللا انت عايز ايه يا سيدى
عايز تضيع حلمنا
قاعد بتنهش ليه قوتنا
ليه بتتفرج علينا
قسمتنا وفرحان فى موتنا
انت عايز ايه ولايه
تبقى وحدك فيها حاكم
باسم دين الله وتلغى
اى شئ اسمه المحاكم
ايه اللى عايزه قول وليه
انت عايز ايه ياعم
شيلتنا احزان وهم
احكى . اخلص . يلا قول
اللى بيعارضك ياسيدى
اما كافر
اما فاسد
او فلول
انتوا المخلصين وخلاص
ومفيش بعدكم اخلاص
والحقيقة بس مرة
الحقيقة مش اصول
اشتريت بالدين كراسى
واللى قام بالثورة احنا
انت فاكر وللا ناسى
مش احنا اللى ضحينا بروحنا
جى من بعيد تخطف وطن
طول عمره عايش فى المحن
وليل نهار باسم الشريعة
صدعت راسنا
.......................
نفسى الاقى الغيمة عدت
والأمل يملا النفوس
نفسى نرجع للشوارع والميدان
لما نخلص م الكابوس
مصر رح ترجع عروسة
لما نتعاهد ونخرج م البيوت
لما نقتل خوفنا فينا
والصياح يلغى السكوت
المصرى ده ميخفش موت
ده احنا اشرس م الشراسة
واحنا اللى خوفنا الموت
هات عمرك على عمرى
الموت لا بأمرك ولا بأمرى
ده يونس خرج بأمان
وهو اللى بلعه الحوت
ضحكوا عليك يا ولد
وسرقوا احلامك
قاعد بتتفرج كما العاجز
وقعدتك بتقوى من خانك
لما نتفكك هنخسر حلمنا
ولما نتوحد
فى الحديد هنفوت

نقول ثورة

نقول ثورة
وهم يقولوا . لأ ذكرى
نقول هنعيدها من تانى
يقولوا الصبر . هنغير
لكن بكرة
اعلام الشرف بيحاول البنا
بيوضح كل شئ وبجد
واعلامنا اللى من قوتنا
ما زال بيهد
ما زال خادم لأسياده

رضى لنفسه
يصير كالعبد
شاشات الدين
برامجها تجنن العاقل
شيوخ بتكلم الجاهلين
وبعد الجهل ايه فاضل
حرام يا خلق (الرحمة)
فين العقل و(الحكمة)
وحق (الناس)
دى ثورة (فتح )
مش تمليك
لفكر لكلمتين (حافظ )
بيسرق مننا الاحساس
عاملين حساب الشعب
بالتخطيط
ولما يتمكنوا م الكل
بالجزمة رح ننداس
...........
ليه مش عايز تخرج
من ذل الفرجة
على الشاشة وقراية الجرنال
متلفح بعباية عبطك
مش فاهم ولا عايز تفهم
ان بيلعبوا بيك الاخوان
ليه مش عايز زينا تحلم
وتخرج معنا لكل ميدان
لو بتخاف م الموت
متخفش
الموت عايشينه بقالنا
زمان
......
ادفع ضريبة الراحة
لنفسك ولولادك
لاخواتك وأحفادك
ولوطن شايلك
وان مت ايه يعنى
هتروح لفين م الموت
اكيد الموت فى يوم
جايلك
ما بين بكرة وبين بعده
مش فارقة
كرهنا النهب والسرقة
ياخايب الرجا
صحصح وفوق علقلك
السكران
بندور على حقك وبتسيبنا
حاسبينك جبان
بتنام فى بيتك كما العاجز
ولو تقبل تبقى تستاهل
الايد ع الايد تساعد
تمن الحرية مش ساهل
.............
لو خايف تخرج علشان وطنك
قدم بايدك كفنك
وابعد عنا
اوعى تقول انا مصرى
ف مرة
أو انك واحد منا
قدم كفنك واحنا هنقبل
لما يقولوا ف بلدك مات
واحنا ساعتها نعزى فى موتك
صعب نعاتب فى الأموات
واللى معاك ف الدايرة
الخايبة
واللى حبالهم دى حبال
دايبة
بكرة الذل يبكى عنيهم
 لما الظلم يقرب ليهم
بس هيبقى الوقت ده فات

ثورة شعب

سنة بتعدى وسنة بتفوت
ثورة شعب ومش هتموت
اما نحقق حلمنا فيكى
اما فداكى يا غالية نموت
..............
مصر يا أغلى بلاد الكون
يا اللى رسمنا بدمنا اسمك
مش رح نخضع مهما يكون
ولا رح نقبل باللى يخون
شعبك واقف فيكى وحارسك
مش رح يقبل تانى سكوت
سنة بتعدى وسنة بتفوت
ثورة شعب ومش هتموت
................
النايم لا بد يفوق
يصحى حلمنا المخنوق
يرجع مصر لولادها
ويخطف حلمنا المسروق
السائل بقى المسؤل
والقاتل صبح مقتول
شعب حزين لأ مش مبسوط
سنة بتعدى وسنة بتفوت
ثورة شعب ومش هتموت
.................
ميدان العزة مستنى
بينده يلا يا ولادى
بدم اخواتنا متحنى
بيصرخ قومى يا بلادى
مين غيرنا هيحميكى
ويرسم حلمك الصاحى
بروحنا يا مصر تفديكى
عشان نرتاح وترتاحى
وكفايا حزننا المكبوت
سنة بتعدى وسنة بتفوت
ثورة شعب ومش هتموت
...................
لو حلمك فى اخر الكون
نعدى الصعب لعيونك
نشيل على روسنا
اللى يخلصلك
ونخرج ع اللى بيخونك
ده انا ابنك . بشيل اسمك
ومحبوبك ومجنونك
ولعيونك بيعلى الصوت
..
سنة بتعدى وسنة بتفوت
ثورة شعب ومش هتموت
اما نحقق حلمنا فيكى
اما يا غالية فداكى نموت